Գարգառում առաջին անգամ անցկացվեց «Գարգառի Բրոկոլի» փառատոն
Լոռու մարզի Գարգառ գյուղում կազմակերպվել էր բրոկոլիի փառատոն, որի նպատակն էր նպաստել գյուղական համայնքների տնտեսական հզորացմանը, տեղացիներին և զբոսաշրջիկներին ներկայացնել Գարգառ գյուղում աճեցվող բրոկոլին՝ որպես առողջ սննդի անբաժանելի մաս, ինչպես նաև բարձրացնել այս մշակաբույսի օգտակարության և առողջարար նշանակության վերաբերյալ տեղեկացվածության մակարդակը:
Փառատոնին մասնակցում էին նաև Վորլդ Վիժն Հայաստանի Լոռու մարզի Տնտեսական զարգացման ծրագրի ֆերմերային խմբերը, որոնք հնարավորություն ունեցան ներկայացնելու իրենց արտադրանքը սպառողներին: Տաղավարներում ներկայացված էին նաև այլ համայնքների խմբեր և անհատներ:
Փառատոնն ուղեկցվեց բրոկոլիից պատրաստված ուտեստների հյուրասիրությամբ, ազգային երգ ու պարով, «Ձմերուկ» մանկական զարգացման կենտրոնի յուրահատուկ շոու ծրագրերով: Ներկա բրոկոլիասերները հնարավորություն ունեցան գնելու օգտակար բանջարեղենը հենց աճեցնողներից: